Day 3(25 Oct 2017) 安國站(韓服體驗）》景福宮 》 通仁市場 》 首爾站Lotte Mart 》 市廳站
安國站⋯今日第一個目的地，做啲咩⋯食早餐先啦⋯轉頭先講。
唔好以為呢個份量係一份早餐⋯其實係兩份早餐嚟的。
一個係牛肉卷飯，另一個係（餐牌註名係）方便麵，對我來講應該叫做方便消化嘅麵，因為食完之後轉頭已經覺得好肚餓⋯個方便麵都唔知去咗邊。
沿途見到嘅花⋯應該係蘭花⋯除非唔係。
今日第一個節目就係⋯韓服體驗⋯我要喬裝做Oppa。
男女同價⋯租四個小時每人要港幣＄104。
店裏面嘅顧客⋯以女士為多，我都唔明自己點解要玩埋一份，感覺上好似有少少中伏咁，不過出到大街嘅時候⋯都發現好多男士及小鮮肉著住韓服，感覺上自己都唔係太過礙眼⋯算OK啦。
換上韓服後⋯兩條友仔(花名：男嘅叫做肥鮮肉，女嘅叫做大長君或叫大肚膯）就大搖大擺行去景福宮影相，感覺上都幾特別⋯好似拍緊韓劇咁樣，係一個唔錯嘅體驗，有機會大家都可以試吓嘅。
好靚嘅銀杏樹。
換返自己嘅衫後⋯已經係中午時份，即刻走去搵嘢食⋯今次食'黃生家'餃子。
去到門口已經有好多人排隊，排左大約20分鐘先有位。
'黃生家'最出名就係餃子、餃子、餃子、全部都係餃子⋯有湯餃子、蒸餃子、刀削麵，今次又發揮左我哋香港人嘅精神⋯就係眼闊肚窄喇，起初以為自己食得晒⋯誰不知⋯根本冇可能，食物嚟到嘅時候先發現呢度d餃子係XXXL size⋯食三四隻已經飽到上心口，更何況兩條友總共要食12隻加一碗刀削麵⋯邊有可能呀，自問平時都會盡量食晒啲嘢唔會浪費⋯不過今次實在係無能為力，到最後都係食剩左。
俗語有云⋯牛有四個胃、而女人就有兩個胃⋯一個係for 正餐、另一個係for 甜品，團友2號係飽到上心口嘅情況之下話想食甜品⋯真利害⋯小弟佩服佩服。
甜品時間⋯紅豆泡冰⋯超好味。
食飽飽後⋯就行咗去通仁市場，睇吓有咩嘢look 下⋯順便做下運動消化下，評語⋯不去也罷。
轉個頭我哋已經到咗首爾站嘅⋯Lotte Mart 超市搏殺。
晚餐時間⋯今晚食蟹：）
雪蟹、帝王蟹食堂 (대게 킹크랩 도소매)
搭地鐵至2號線[市廳站] 7號出口行8分鐘就到。
呢間鋪頭嘅餐牌係：雪場蟹要59000韓圜一位、阿拉斯加長腳蟹要69000韓圜一位，最後每個餐都叫左一份。（註：每個餐並不代表會有一整隻蟹，而係以重量來計算）
呢舊魚幾好味⋯開頭我都唔知係咩魚，最後先發現係魔鬼魚⋯即係魟魚。
刺身⋯個人覺得就麻麻哋。
最期望嘅蟹終於上枱喇⋯味道都唔錯⋯幾新鮮，記住啲蟹膏唔好食⋯留返嚟撈飯再加啲紫菜芝麻就超好味。
就係呢個飯，將啲蟹膏撈埋一齊⋯就算你食到幾飽⋯你都好想好想將d飯放哂入你個肚裏面⋯超好味。
雪場蟹方便麵⋯太飽的話可以唔理佢。
***Day 3 完***
沒有留言:
張貼留言