雄川之滝上流展望所 > 雄川之滝下游駐車場 > 佐多岬南大隅町玻璃底潛水展望船
由於尋晚嘅晚餐食得太少喇⋯所以今早食返多啲補返數，其實都係食多幾件麵包姐。
成枱都係麵包。
長征⋯由宮崎揸長途車去南大隅，不過⋯又開始落起雨嚟。
中途經過一間超市⋯佢嘅外表似一間貨倉多d⋯裏面啲嘢又真係比出邊嘅超級市場平一點。
雄川之滝上流展望所MC: 170 099 487*61
第一站雄川之滝上流展望所⋯係呢個位睇嘅瀑布係冇咩特別，所以出發去下一個站（註：係呢個位置發生左一件特別嘅事件，但詳情不便在此透露）。
離開上流⋯我哋嘅下個目的地係下游嘅步行徑，可惜⋯雨勢開始漸大，加上出發前準備嘅Mapcode並不正確，所以在搵路過程中十分狼狽。
係咁嘅環境之下搵路⋯就發生左一宗交通意外，令到團友3號受到不必要嘅損傷，本人在此表示歉意及內疚。
意外發生經過：搵目的地嘅時錯誤駛入一條好細好窄嘅山邊小路，加上雨勢又開始漸大⋯所以令到視線受阻。係咁嘅環境之下倒車⋯真係十分危險，在倒車過程中突然間聽到一聲巨響，那時才知道左邊近車尾嘅位置碰上石頭，令到一部份嘅車身部件移位，不幸中嘅大幸⋯團友3號嘅傷勢並不是太過嚴重。
雄川之滝下游駐車場
千辛萬苦之下⋯我哋終於嚟到下游步行徑停車場，雨⋯亦開始停下來。
由於今日實在太過忙碌，我哋都忘記咗要食午餐⋯所以就簡簡單單喺停車場食個麵包就算數，黑糖麵包真係幾好食⋯每個只需￥105，大家見到嘅話不妨買來試吓啦。
步行徑全長1200K⋯來回要2400K，加上天雨路滑、濕度偏高、又要上上落落⋯行起上嚟都幾辛苦下。
可能之前受到強風嘅吹襲，所以沿途都見到好多樹木都被摧毁。
終於嚟到天然秘境喇。
真係幾靚⋯天氣好嘅話⋯會靚好多。
南大隅町さたでい号待合所
(佐多岬南大隅町玻璃底潛水展望船）https://hk.lifestyle.appledaily.com/lifestyle/travel/daily/article/20171205/20234765
住所:鹿児島県肝属郡南大隅町佐多馬籠４８６−４
MC: 605 306 605*82
唔開心嘅事總會發生，唔知是否係天氣嘅問題⋯大風大浪or 最後一班船已經可以開出，下午3點左右嚟到嘅時候⋯辦事處已經關門⋯沒有人在內，睇嚟今日都冇機會坐到呢隻玻璃底嘅船，我們只好回程去今晚住嘅溫泉酒店check-in，每個旅程總會有一點遺憾⋯就當一點回憶。
ねじめ温泉・ネッピー館
所在地：〒893-2502 鹿児島県肝属郡南大隅町根占川南７３２
今晚入住嘅酒店⋯check-in嘅時候比人眼望望(註：好奇嘅眼光），可能入住嘅旅客以本地人居多⋯甚少見到外地旅客。
我比較鍾意呢間酒店嘅安排⋯床舖係要自己準備的 ，旅客亦唔使擔心自已食飯嘅時候有其他人入過自己間房。
飯前⋯見有時間就去咗酒店隔離嘅超市行咗一轉，都幾多嘢買，團友2號見到包雞飼料就話係日本大米⋯問有冇興趣買返香港，我同佢講我唔係雞⋯唔食雞食嘅嘢，因為我唔係一隻雞（註：邊有雞咁大隻）。
好喇⋯嚟到食晚餐嘅時候喇，希望唔會好似尋晚嗰餐咁難食。
今晚我揀咗食鹿兒島豚肉火鍋。
今晚嘅魚生雖然唔係貴價野⋯勝在夠新鮮⋯唔會有一陣魚腥味⋯好味。
首先要落晒啲蔬菜豆腐先，水滾後先落豬肉。
鹿兒島豚肉都幾好味。
***Day 5 完***
沒有留言:
張貼留言