行程：Naha Main Place 新都心 》午餐：和風亭 》オクマ プライベートビーチ ＆ リゾート 包晚餐
第四日⋯要離開住咗三晚嘅酒店，揸車向沖繩中部及北部進發。
駕車期間⋯因時間尚早，團友提議先去新都心走返轉…睇下野、又可以shopping。
到達新都心附近眼見有超市、100￥店⋯超有興趣，所以馬上駛入超市及100￥嘅停車場，但自己可能未瞓醒⋯泊車期間只留意泊車位嘅右邊有沒有車、沒有留意左邊，亦可能係鬼黯眼睇唔到⋯其實我真係見到左邊冇車，而家諗返起都好詭異，倒後泊車期間特然聽到彭的一聲⋯隨後而來一把女高音嘅尖叫聲(對方司機），如夢初醒嘅我才發現意外已經發生⋯連續兩下撞擊，第一下撞擊係自己唔小心、第二下係比女高音嚇親，雖然兩架車都損毁輕微⋯但仍然都要報警處理，如果唔係⋯還車嘅時候我要賠償一大筆錢比對方司機及租車公司，因為我已經買咗NOC計劃⋯所以最多賠償￥20000，警察嚟到之後⋯用咗好多時間處理，原因：係佢哋唔識講英文⋯溝通唔到⋯全程要搵Google幫手，但警察仍然有好多野都解釋唔清楚⋯例如沒有意外報告，因回香港後申請保險賠償是需要的，最後我只好打電話去租車公司嘅英文熱線⋯搵人翻譯才圓滿解決問題，不過都浪費左我哋好多時間⋯鬼叫自己唔小心。
黑衣人就係女高音司機。
Naha Main Place 新都心
意外發生後⋯雖然有一點兒不開心（註：因為要賠錢⋯冇咗￥20000），但行程仍然都要繼續⋯我哋只好用購物去分散注意力，藉口真好⋯夠偉大。
和風亭
經過一輪廝殺後⋯Shopping，大家都肚仔餓了⋯午餐時間，今日決定食天婦羅⋯可能係日本假期嘅關係所以都要等候半個鐘先安排到位置。
都係嗰句 ，喺日本求其搵間餐廳都好好味。
オクマ プライベートビーチ ＆ リゾート
午餐後⋯出發去今晚下榻嘅酒店。
就係呢間Resort⋯一間三人房包早晚餐只需要￥30000，而食物嘅質素及味道都唔錯⋯出乎意料之外。。
佢哋仲upgrade咗我哋間房先，由普通兩張床嘅房間升級到有上下層嘅大房⋯爽呀。
上邊仲有兩張床。
Check in後，我哋就把握時間去酒店外邊嘅沙灘行吓影吓相，日落嘅襯托下⋯好靚。
海風迎面吹過嚟⋯周圍嘅環境都好寧靜好舒服，最適合比人洗滌心靈 。
玻璃教堂⋯喺度結婚都幾浪漫㗎。
晚餐嘅地方⋯今晚食buffet，當知道食buffet嘅時候⋯團友3號就發自內心地好自然咁講咗一句⋯爽呀，當時聽起來真係超好笑，之後我哋就成日講呢兩個字跟團友3號開玩笑⋯無論咩事都會講：爽呀。
當晚我地食咗好多甜品。
呢個超好食。
當知道晚餐係食buffet嘅時候⋯原本以為食物嘅質素都應該到唔會太好、期望唔會太高，但出乎意料之外⋯所有嘢都好好味，本人最欣賞雞翼同埋所有甜品、牛扒都唔錯，淨係食甜品已經回本啦。
自製嘅魚生飯⋯唔好以為好多飯，其實白飯嘅下邊全部都係三文魚子同飛魚子⋯所以呢碗飯超好食。
綠色嗰舊嘢團友2號超鍾意食，大約食咗10件左右⋯可能再多啲。
食飽飽後⋯我哋就係房間嘅露台望吓周圍嘅風景、再望吓滿天星星、聽吓夏蟲嘅聲音，喺香港都冇咩機會聽到（註：喺香港只可以聽到周圍嘅車聲及人們嘅嘈吵聲）。
***Day4 完***
Naha Main Place 新都心 MC:33 188 501*80
午餐：和風亭 4-chōme-4-9 Omoromachi, Naha, Okinawa 900-0006日本 Tel:098-951-3301
住：オクマ プライベートビーチ ＆ リゾート
〒905-1412 沖縄県国頭郡国頭村字奥間９１３Tel:0980-41-2222 MC: 485 829 617*53
沒有留言:
張貼留言