行程：糸滿漁業合作社 鮮魚中心 》美らイチゴ 糸満ハウス 》斎場御嶽 / 知念岬公園 》首里城公園 》 ジャッキー ステーキハウス （JACK'S STEAK HOUSE）
早餐⋯係入住嘅洒店享用，味道唔錯而且款式都幾多。
大家估下綠色呢粒野係咩黎嘅？
佢就係日本品種嘅西蘭花，外貌同香港食個啲西蘭花分別都幾大、味道都唔同⋯個人覺得佢好味d。
糸滿漁業合作社 鮮魚中心⋯比較少外來人嚟呢個魚市場，主要都係本地人幫襯多d，大多數遊客都會去泊港漁市場，糸滿鮮魚中心總共由兩個市組成⋯一個主要賣蔬菜同埋乾貨、而另一個就係賣海鮮的。
呢個就係賣蔬果乾貨嘅市場。
而呢一個就係賣海鮮嘅市場。
乾貨市場其實都好多嘢賣，有好多野係香港都未見過⋯真係新奇、有趣 ⋯大開眼界，而且價錢仲好平先，我哋都滿載而歸。
呢個就係今朝早餐食過嘅日本品種西蘭花。
而呢一個就係海鮮市場⋯客人可以喺度買海鮮返屋企/酒店食或者即場食都得，我哋就冇幫襯，因為要留肚去下一個景點搏殺⋯無謂浪費子彈。
睇吓啲海膽⋯真係好吸引㗎。
之後去到另一個目的地⋯就係每位￥1800 40分鐘內任摘任食士多啤梨，參賽選手有三位：團友1號～綽號：大肚腩、團友2號～綽號：草莓毁滅者（笑死）、團友3號~綽號：爽呀，睇吓最後邊個食得最多(數量)啦。
佢總共有四個品種比你任摘任食，但對我地嚟講⋯只可以分得出兩至三個品種。
睇吓⋯每粒士多啤梨都好大㗎。
公佈結果：團友1號有65粒、團友2號有45粒、而團友3號只得37粒(佢話佢每一粒都比我哋嗰啲大喎，所以要計多啲⋯真係死雞撐飯蓋，講明係以數量計算嗎）。
斎場御嶽
嚟到沖繩始終都要搵一兩個景點打下卡， 斎場御嶽:要比入場費而且要行一段頗長嘅上山及下山爛泥路，所以千祈唔好着咁靚嘅鞋嚟⋯如果唔係之後嘅清潔工作有排做，個人覺得呢度冇咩特別。
反而喺呢間鋪頭我哋就留左好耐⋯原因：女人嘅天性~shopping。
鋪頭入邊嘅貓貓，當日佢好似食咗迷藥咁樣⋯你用手摸佢、滅佢、打佢（當然冇打佢啦⋯佢咁可愛）都冇反應。
知念岬公園
當日嘅天氣都OK、風好大唔太熱，周圍嘅環境唔錯都好靚⋯值得到此一遊。
首里城公園
可以用到此一遊嚟形容，入場費每人需要￥800，但當你喺外面已經睇晒70%風景⋯我就覺得唔需要比錢入場睇埋另外嘅30%內容，反正入到去我都唔識睇佢啲日文告示啦⋯最重要係我冇興趣、市儈⋯唔想浪費金錢。
係外邊影相已經好靚啦。
好啦⋯又係食飯嘅時候，不過食飯之前就要到尋晚到過嘅拉麵店⋯睇吓會否搵返留低嗰把雨傘，Lucky⋯上天都對我不薄，再度重與你(雨傘）。
ジャッキー ステーキハウス （JACK'S STEAK HOUSE）
晚飯嘅餐廳⋯今晚食牛扒，現場可見⋯超多人排隊，好多當地人及駐守沖繩嘅美軍都嚟呢道食飯，最後都要等咗40分鐘才有位。
有三種套餐：250g-￥2500、200g-¥2300、150g-￥2100⋯包餐湯及麵包或飯。
咁遠嚟到食⋯而且又等左咁耐，我哋每個人都係order左最大份量嗰個套餐，牛扒嚟到⋯睇就覺得塊牛扒好大，但可能太好味⋯連女仕都可以輕易KO哂，大家仲想叫其他嘢食先⋯最後都冇order到。
食飽飽後⋯當然要搵啲活動消耗下體力啦，就係去藥房shopping la，呢位女仕成日都話自己唔係買好多嘢，但最後坐飛機離開沖繩嘅時候⋯佢身上嘅腰包、手袋、手錶全部都係喺日本新買的，都仲未計行李箱裏面嘅嘢⋯咁樣都叫做唔買得多野？？？
經過一輪搏殺後大家就回酒店休息...準備明天嘅行程。
***Day 2 完***
糸滿漁業合作社 鮮魚中心 09:00~18:00
地址: 沖縄県糸満市西崎町4-20-4 Tel: 098-992-2803MC: 232 484 079*83
美らイチゴ 糸満ハウス 10:00-16:00 MON/FRI CLOSE
沖縄県糸満市伊原352 Tel:090-4341-4115 MC: 232 308 541*64
斎場御嶽 / 知念岬公園9:00～18:00
沖繩縣 南城市 知念久手堅
Tel: 098-949-1899 MC:232 594 674*42
首里城公園 8:00-18:30 (free car park)
〒903-0815 沖縄県那覇市首里金城町１丁目2 Tel: 098-886-2020 MC:33 161 467*72
ジャッキー ステーキハウス （JACK'S STEAK HOUSE） 3.58 11:30-01:30 (free car park)
沖縄県那覇市西1-7-3 Tel: 098-868-2408
沒有留言:
張貼留言